ΤΙ ΚΙΦΑΛΙ ΚΑΙ ΤΙ ΠΟΔΑΡΙ

Απάν' σα γεράδες φουσκαλίδας.

          .....Έρθεν και  εκόλτσεν και τη Αλέξη Γρηγορόπουλου από πίς' !! Τα κυβερνήσεις εμουν ας σο κακόν σο κι άλλο χείρ'. Τολάϊστο ούς τ' ατώρα. Το δημόσιον χρέος εκαπάτεψε μας. Τα ελλείμματα εφούρξαν' εμας, και έχωμε και λέωμε: Μόλυνση του περιβάλλοντος – σ' ατό πα εσέγκαν εμας πόσταν οι Ευρωπαίοι αλλά εμείς....σεΐρ τερούμε!! - Δασμοί αυτοκινήτων, ασφαλιστικά ταμεία, δημόσια υγεία, πληθωρισμός, Ελληνοτουρκικά, Ελληνοσκοπιανά, ρεμούλες γουρζουλάδες και ξέρω 'γώ, υποβάθμιση και εξευτελισμός της αρχαίας και νεώτερης Ελληνικής ιστορίας και του επιπέδου παιδείας, παραπαιδεία, ανεργία, φορολογία, τρομοκρατία, αναρχία, ληστείες, δολοφονίες.......και σ' ατά απάν' .....η γρίπη Η1 Ν1, τεμιάκ η γρίπη των “χήρων” !! Την πίστη σ' εγάμεσαν εμας με τ' ατό την γρίπην. Ατό η γρίπη θα σκοτών' τον κόσμον. Θα φοφούμε άμον τα κοσσάρας, και από έξ' ήμ'ς δισεκατομύρια θα απομένωμε δύο !! Τρέξτεν ποίστεν το εμβόλιον για να γουρταρεύκουστουν. Να μη λιγοστεύωμε απάν σον πλανήτην!

         Ντο εν αούτο το πράμαν. Κάθαν θεού ημέραν τα τηλεοράσεις και τα ραδιόφωνα βοούν: Ποίστεν το εμβόλιον.....οσήμερον επέθανεν είνας κι άλλο.....οψέ έμπρ' ημέραν εσέβεν αλλ' ένας σο νοσοκομείον με τ' ατό την γρίπην των “χήρων”..... οσήμερον ετσούπωσεν το τάδε σχολείον και άμον ντο φαίνεται τα άλλα πα θα τσουπούνταν....σην Γαλλίαν , σην Γερμανίαν, σην Αγγλίαν ερρώστεσεν ο κόσμον και εμπαίν' κι εβγαίν' σα νοσοκομεία ας σ' ατό τ' αφορισμένον την γρίπην, -(αλήθεια γιατί κι μαθάνωμε ντο ίνεται σ' άλλα κράτη σην Ρουμανίαν ας λέγωμε, σην Τσεχίαν, σην Ν. Ζηλανδίαν, σο Εκουαδόρ, σην Αφρικήν, σην Βραζιλίαν, σην Φιλανδίαν, σην Ταυλάνδην;) - .....Ένας ακόμα άνθρωπος, με επιβαρυμένη κατάσταση υγείας, έχασε τη ζωή του από οξεία αναπνευστική ανεπάρκεια ενώ νοσηλευόταν διασωληνωμένος σε μονάδα εντατικής θεραπείας, έχοντας νοσήσει από τον ιό της νέας γρίπης. Το 31ο θύμα της νόσου στην χώρα μας ήταν ένας άνδρας 62 ετών, επιβεβαιωμένο κρούσμα της νέας γρίπης..... (Από τα Νέα on line Κυριακή 6 Δεκεμβρίου 2009) Και συνεχίζει.

         Σύμφωνα με την τελευταία έκθεση επιδημιολογικής επιτήρησης του κέντρου ελέγχου και πρόληψη νοσημάτων (ΚΕΕΛΠΝΟ) ο αριθμός των ατόμων που έχουν νοσήσει από την νέα γρίπη έφτασε τις 8.463 . - Τερέστεν ατώρα αδακά ντο λέει. - Τα περιστατικά που έχουν επιβεβαιωθεί εργαστηριακά, αφορούν κυρίως παιδιά και νέους ως 34 ετών. Περίπου ο ένας στους τρείς ασθενείς είναι 25-29 ετών, ενώ περισσότερα από 1000 κρούσματα αφορούν παιδιά 10-14 ετών.....-

         Τεμ(ε)άκ, ο αλεπόν τρώει και η ζεπίρα πρέσκεται....!!! Άλλ' εμπαίν' νε σα νοσοκομεία, και άλλ' αποθάν' νε !! Οψέ ξαν επέθανεν είνας γαρή υπέρβαρεσα, που είχεν άσθμα, καρδίαν, λοιμώξεις και τ' έναν αλλ' έναν....! Αλλά ως φαίνεται ατοίν που αποθάν' νε είναι χήροι, για ζωντόχηροι !! Αφού ατό η γρίπη εν των “χήρων”....Αέτ'ς κι λέν' ατεν;

         Και ντο να εφτάμε ατώρα. Αφού κι ξέρωμε ατό το εμβόλιον ντο εν κι απ' όθεν έρθεν. Και σύρ' πολλά ατό η δουλεία. Πάει βαθέα, θέλωμε πολλά χαρτία για να γράφτωμε και τουρτεύωμ' ατο.   Και σ' ατό το δελίαγμαν κι άλλο πολλά φταίξιμον έχνε οι δημοσιογράφοι, τα τηλεοράσεις, και τα ραδιόφωνα. Ζατίμ ατό η τηλεόραση τρώει όλια τα “σκατά”, παρέξ' εσουν. Εποίκε μας άμον “χαιβάνια”, παρέξ' παρέξ'.....

         -...... Το επιχείρημα της επικινδυνότητας του εμβολίου ως λόγος μη εμβολιασμού του πληθυσμού είναι το ολιγότερο επιχείρημα αφελές. Από καμία μελέτη μέχρι σήμερα δεν προκύπτει ότι οι παρενέργειες του εμβολίου κατά του Η1 Ν1 δεν είναι ανάλογες με του εμβολίου της κοινής γρίπης. Βέβαια όλα αυτά ισχύουν με βάση τα σημερινά δεδομένα τα οποία δεν έχουμε κανέναν σοβαρό λόγο να πιστεύουμε ότι θα αλλάξουν. Από κει και πέρα υπάρχουν τα πάσης φύσεως συμφέροντα και οι τηλεθεάσεις με ότι αυτό συνεπάγεται που κάθε μέρα με την υπερβολική προβολή ορισμένων ειδήσεων δημιουργούν σύγχυση και πανικό στον κόσμο. Μήπως το ραδιοτηλεοπτικό συμβούλιο θα μπορούσε να βοηθήσει για τη σωστή ενημέρωση του κοινού; (Από το site: Νέα γρίπη. Ενημέρωση.) -

         Κόσμε, ατό η δουλεία με το εμβόλιον άμον κάτ' βρωμά !! Και ατά ντο ακούτεν και ελέπετεν βάλτ' ατα σο τεπούρ'. Όλια μη πιστεύετεν. Μίαν εγώ κι εποίκα το εμβόλιον κι ας είμαι και ζωντόχηρος. Ατοίν πα οι τρισκατάρατοι εξέγκαν το εμβόλιον των “χήρων”. Κι εξέγκαν εμβόλιον κατά τη πεθεράς !!

         Σ' ατά όλια απάν' ερούξε μας κι ατός ο Αλέξης Γρηγορόπουλος.... Άλλο πελιάν ατό πά. Θα έχωμε επεισόδια ξάν' και ταλασέματα.... Μαχανάδες. Θα εφτάμ' ατον και ήρωαν ατώρα. Οψέ κές έστειλαν εμε μήνυμα σο facebook που έλεεν: Τιμή και δόξα στον Αλέξη Γρηγορόπουλο...!! Εξέβεν το αίμα μ' σο κιφάλι μ'. Ελάγγεψεν το τσιμίδι μ'. Γιά σταθέστεν, για σταθέστεν είπα εγώ. Γιατί δόξα και τιμήν σ' ατό το “καλόπαιδον”; Ντο εποίκεν και πρέπ' να δοξάζωμ' ατον; Επειδή εσκότωσεν ατον είνας βλάκας αστυνομικός; Και ντό ευτάμεν ατώρα; Αραεύωμε απές σα κόπρια και σα κουσκούρια τη Ελληνικής κοινωνίας να ευρίκωμε ήρωες γιατί κι είναι άλλ'; Νέϊσα, είπα πολλά σο facebook αλλά κι επορώ να γράφτ' ατα όλια αδακά γιατί κι θά εχωρώ απές σην εφημερίδαν και θα χατεύμεν  ο εκδότης !!

         Με τ' ατά και με τ ατά εσέβαμε σον Χριστιανάρ. Ας τερούμε να έχωμε την ύιαν εμουν, να ουγεύωμε, να παρουσεύωμε, και δεβάζωμε τα γιορτάς έμορφα και οικογενειακά.       

                                                                6 Χριστιανάρ' 2009

                                                              Κεβρεκίδης Αλέξανδρος